Lu’u Lu’u 34

Bismillahir rahamanir rahim_

*34*

Fitowa tayi daga ban d’akin ta kama wuyan hannunta ba tare data mata magana ba, zafin da ta ji a hannun na ta yasa ta dafa wuyanta, kallonta tayi kamar zata fashe da wani kukan tace “Ayam kin ji fa jikinki zafi, me yasa wai ba zaki fad’a mana wanda ya miki wannan abun ba? Ayam har fa cikin gidan mahaifinki haka ta faru.”

A sanyaye sosai cike da kasala tace “Mahhhh! Karki damu kanki mana, ba abinda kike tunani ba ne.”

Da kallon mamaki tace “Haba Ayam, ni fa na haifeki da cikina, kallo d’aya na miki nasan wani abu ya faru dake.”

Cike da gajiyawa ta d’ora kanta a kafad’ar Juman tace “Mah zaune na ke so na yi.”

Janta tayi zuwa ban d’akin tana fad’in “A’a ba zama zakiyi ba, mu je kiyi wanka.”

Shagwab’ewa tayi tace “Amma kuma Mah sanyi nake ji.”

Ba fara’a a fuskarta tace “Haka zaki hak’ura.”

Suna shiga ban d’akin ta nuna mata bahon wankan tace “Cire kayanki ki zauna a ciki.”

Cikin dubara ta fara aje pant d’inta da har lokacin yake mak’ale a hannunta gam, a sanyaye ta shiga zame rigar jikinta har ta cireta gaba d’aya, k’arasawa tayi ta d’an taka tudun wajen da bai kai tudun matakala ba sannan ta fara zura k’afarta ta dama.

Da sauri ta cire tana furta “Washhhh!”

Juyawa tayi ta kalli Mah data matso kusanta ta kamata, kakkare jikinta ta fara yi tana fad’in “Mah dama baki fita ba? Please ki fita ki barni, ni fa ba yarinya ba ce.”

Ba ta kula da abinda ta ce ba sai kallon k’fafunta da take tace “Shiga ki zauna min.”

Cikin d’ari d’ari ta sake zura k’afafun har ta fara k’ok’arin zaunawa a ciki, tana zaunawa ta ji wani fitsari na neman kubto mata saboda zafin da ta ji na ruwan, a firgice ta mik’e tsaye tana shirin yin magana Juman tace “Bana son wasa Ayam, zauna min a ciki.”

Cikin kuka tace “Mah zafi wallahi, k’onewa zan yi.”

Harara ta dalla mata da Ayam d’in bata tab’a tunanin zata iya yin ta ba sannan tace “Zaki zauna ko sai na jefaki da k’arfi?”

Da sauri ta rintse ido ta fara sunkuyawa a hankali har ta zauna ciki tsumdum, bakin bahon ta rik’e gam gam idonta a rufe duk da haka tana jin suna cika da hawaye, kasa zama tayi wuri d’aya haka ta dinga motsawa tana ta yan dabaru saboda rad’ad’i take ji sosai, sannu sannu kawai ta fara ji zafin ruwan na raguwa saida ta ji ta zauna daidai ba tare data motsa ba.

Lura da haka yasa Juman a dak’ile ta mik’o mata farin towel tace “Tashi ki d’aura wannan.”

Karb’a tayi ta mik’e tsaye ta d’aura sannan ta fito, wata k’aramar buta mai ruwan gold ta k’arfe ta nuna mata tace “Sake kama min ruwa a nan.”

A sangarce ta kalleta tace “Again?”

Ba alamar wasa tace “Yeah, zuwa safe kuma da kaina zan kaiki asibiti a tabbatar min da lafiyarki.”

Numfashi ta sauke ita dai ta duk’a dan kama ruwan, wani sabulu ta mik’o mata na ruwa na kuma tsarki tace “Ki wanke da wannan.”

Karb’a tayi ta matsa sabulun a hannunta sannan ta shiga wanke gabanta da kyau, tana idawa ta mik’e ganin Juman ta fita tana fad’in “Sai kiyi wankan tsarki.”

*Sarki Musail* na fita daga d’akin kai tsaye b’angaren masaukin bak’in ya nufa, yana zuwa daidai k’ofar d’akin ya k’wank’wasa.

Umad da fitowarsa kenan ya d’ora idonshi akan gadon, ganin bata nan ne ya firgita ya fara neman riga dan sakawa ya fita, yana tsaka da neman rigar sakawa ya ji an k’wank’wasa k’ofar, da sauri ya juya ya kalla sai kuma ya taka da niyyar zuwa ya bud’e da tunanin ko ita ce ta dawo, dalilin mantuwa ko dai ta canza shawara? Yana bud’ewa tsakninshi da mahaliccinsa ne saida ya ji fad’uwar gaba ganin sarki Musail a tsaye, sarki sarakuna mai ji da isa da k’asaita.

D’auke idonshi yayi ya mayar da duban k’asa, lura da ba tafiya zaiyi yanzu ba yasa shi rab’ewa, yanda hannayenshi ke baya duka ya goyasu cikin gadara ya fara takowa cikin d’akin, saida ya shigo Umad ya maida k’ofar ya rufe sannan ya juya yana k’arasa saka rigar dake hannunshi.

A ladabce cikin girmamawa ya kalli k’eyarsa yace “Yal’ab’ai lafiya?”

A hankali ya juyo ya sauke dubanshi akan Umad d’in, ba alamar wasa a tare da shi kamar yanda yanayinshi yayi daidai da wanda zai iya firgita mutum ya bud’a bakinsa da k’yar yace ” *Sadakin ‘yata na zo karb’a*.”

Murd’awa kayan cikinsa sukayi tare da hautsinawar da tasa ya dafe k’irji, a baibai ya kalli sarki Musail d’in yana neman k’arin bayani yace “Yallab’ai?”

A sanyaye ya dawo da hannayenshi gaba ya had’esu ya kuma tsatsareshi da ido sannan yace “Sadakin ‘yata na ce, ka manta da ka yi alk’awarin mallaka mata makullan motar da ka fi so wato Ferrari? Amma kuma har yanzu kana murzata ka manta da ba taka ba ce.”

Numfashi ya sauke kafin ya gyara tsayuwarsa yace “Na ga ka mori sadakinka, shiyasa na zo karb’an sadakin da kai na, dan nasan kai ma ka sani aurenka da *Ayam* ba nagartacce ba ne saboda dalili d’aya tak.”

Yanayin da yake kallo kamar na tsoro yasa sarki Musail yin murmushi ya sake gyara tsayiwa a gadarance yace” Dalilin shi ne a lokacin da Juman ta ba wa Habbee yarinyar nan, basuyi yarjejeniya kan ce wa idan sun samu mijin da ya dace su aura mata ba, sai gashi su sun aurar da ita babu amincewar iyayenta alhalin kuma mu na raye, dan haka a shari’ar musulunci ma auren nan bai yi ba.”

Yar dariya ya k’yalk’yala tare da fad’in” Amma ka kwantar da hankalinka, na yarda da kai ai, shiyasa ma ban kwance auren ba tun a inda aka d’aurashi ba.”

Da matsanancin mamaki Umad ya ji kanshi na neman yin bindiga yace” Yallab’ai, ta ya ka yi duk kasan wannan? Ka samu su Habbee ne?”

Bushewa yayi da wata dariya ya waro ido yana kallonshi yace” Samun su kuma? Bayan ka b’oyesu a fadar suriki na?”

Girgiza kai yayi yace” Umad! Umad! Umad, idan har zan fad’a maka abinda na sani a yanzun, to tabbas kan ka zai fashe.”

Cikin k’asaita ya maida hannayenshi bayanshi ya goyasu sannan ya kalli Umad fuska a had’e yace” Kafin ‘yata ta farka daga bacci ina son damk’ar sadakinta a hannu na, ko kuma rai yayi mugun b’aci, dan zan iya yin komai a kan ta.”

Tako d’ai d’ai ya fita a d’akin ya bar Umad da jimami, zulumi, tunani da kuma firgici mai d’auke da tsantsar mamaki, sai ma ya rasa ta inda zai fara tunanin? Ta ya haka ya faru? Ko dai tubka ya ke ta gaba ana warwara ta baya? Anya kuwa su Habbee babu alamar tambaya a kan su? Ko dai shi ma sarki Musail d’in akwai wani abu da yake b’oyewa?