FAMILY DOCTORS HAUSA NOVEL PART 2

Hajja tambayar sa ta soma yi “lafiya?”. Itama duk hankalin ta a tashe

Tsawa ya daka mata yana faɗin, “baza ki ɗauko mu wuce ba ko kuwa? Idan mun je can kya ji”.

Jiki na rawa Hajja ta rataya gyalen ta tabi bayan sa, a motan sa suka nufi asibitin, be sake ce mata komi ba har suka kai Hospital ɗin. Kai tsaye Office ɗin Big Dady suka wuce, a nan suka ga mutane cirko-cirko har da ƴan sanda, ga Safna durƙushe sai kuka take yi

Da kallo Hajja take bin su dashi hankalin ta a matuƙar tashe, “shin me ke faruwa?” Tambayar dake yawo a ranta kenan babu me amsa mata

“Yauwa officer wannan ita ce me kula da yaron”. Cewar Big Dady yana kallon ASP

“Ok”. ASP yace yana kallon Hajja, sai kuma yace, “kin gane waɗannan?”

Sai a lokacin ma Hajja ta kalli inda wasu Mata da miji dake tsaye suke, macen na kuka sosai itama. Ta gane matar sarai, sai ta gyaɗa kanta domin ta kasa magana

“Ok sun kawo ƙara da cewan sanadiyar ku ɗanta ya mutu, domin bincike ya nuna an ba wa ɗan ƙwayoyi a matsayin magani, wanda hakan yayi sanadin mutuwar sa, ko da suka koma gida sai ciwo rigigim ya kama ɗan, sun kai sa asibiti mafi kusa dasu domin ceto yaron su, a can aka gano an ba shi ƙwayoyi, kuma ita wannan ( ya nuna Safna) ita ce wacce ta ba shi magani a jiya kenan, in ji Mahaifiyar yaron, ita kuma tace “a Office ɗin ki ta ɗauko maganin.” Yanzu binciken da muke yi ya aka yi ƙwayoyin maye masu bugarwa suka shiga Office ɗin ki har aka ba wa yaro ya mutu a sanadin haka?”

Yanda jikin Hajja Fatu ke rawa baza ka ce ƙafafuwan ta za su ɗauke ta ba, sosai ta zaro idanu waje lokaci ɗaya ta jiƙe sharkaf da zufa, ta ma rasa me zata ce illa gaban ta dake faman buga wa kamar zai faso ƙirji

“Baza ki yi magana ba kin tsaya kina kallon Mutane? Ya aka yi ƙwayoyi suka shigo asibitin mu?” Cewar Abba yana daka mata tsawa

Sai kawai Hajja ta fashe da kuka tsaban rikice wa

Cike da baƙin ciki Abba zai sake magana, sai Abbu ya ce da shi, “yi haƙuri don Allah Yaya, a bi komi a hankali”.

ASP yace, “Amm… Ina ga fa dole sai dai mu wuce Station; don maganar nan baza ta yiwu a nan ba, wannan matsalan babba ce ya kamata mu wuce can, akwai yiwuwar a kulle Hospital ɗin nan gaskiya domin babu abinda zan iya”.

“Innalillahi wa’inna ilaihi raji’un”. Abinda su Big Dady suke faɗa kenan. Gaba ɗaya hankalin su ya tashi, ba wai kullewan ba, kar a ɗaga wa mahaifin su hankali, tunda sun san yanda yake matuƙar ji da asibitin nan, wannan babban matsala ne, kisan kai ta hanyar ƙwaya? A matsayin magani?
????????????????????????????????????????
              FAMILY DOCTOR’S
                         ????
????????????????????????????????????????

????????????????????????????
   NAFEESAT RETURN
????????????????????????????

MALLAKAR:
                 NAFISAT ISMA’IL LAWAL

بسم الله الرحمن الرحيم

⚖
FEENAH WRITER’S ASSO????
”’®Ɗaya tamkar da Dubu”’????✓

JIKAR LAWALI CE✍️

Wattapad: UmmuDahirah????

         \F.W.A????/

SADAUKARWA
Na sadaukar ga Family na gaba ɗaya. GOMA’S FAMILY

.

        EPISODE Forty Eight

      Kai tsaye Police station suka wuce gaba ɗaya, inda a can ne Hajja Fatu tayi bayani dalla-dalla, ta yanda ƙwayar suka kasance a asibitin, ta taimaka wa Dr. Zubairu ne wajen shigo da su tare da magungunan asibitin

Nan Abba yayi kamar zai make ta sabida faɗa, sosai ya zuciya ta inda yake shiga ba ta nan yake fita ba

Sai da Big Dady da Abbu suka yi ta tausan sa kafin ya haƙura

Nan aka tura ƴan sanda domin su je su kamo Dr. Zubairu, amma sai dai ba’a same sa ba tuni ya gudu, illa ƙwayoyin da aka kwaso a Office ɗin sa.

      ASP yace musu, “za’a kama Hajja Fatu a matsayin wacce ta taimaka domin yin safaran ƙwayoyi, wanda yayi sanadin kisan kai, ita kuma Safna an sake ta domin bata da laifi”. Sai dai sosai suka ja mata kunne a kan sakacin ta ne duk da haka ya ja wannan abun, tana a matsayin likita amma ba ta lura da abinda zata iya ba Patients ɗin ta

Shi Abba tunda ya ga abun ya zo da sauƙi tunda an sasanta baza a kulle asibitin ba, ya wucewar sa ya tafi, be damu a saki Hajja ko kar a sake ta ba

Inda su Big Dady su suka tsaya kai da fata suka yi ta cukui-cukui har suka shawo kan matsalan, to, abin ka da akwai kuɗi, komi a ƙasar mu idan kana da kuɗi to zaka iya yi, nan suka samu aka ce za’a saki Hajja tunda ba ita ce asalin wacce ta shigo da ƙwayoyin ba, kawai da taimakon ta ne hakan ya faru.

      Kafin ma a sallame su har an kamo Dr. Zubairu, sosai yaji kunya sanda suka haɗu da su Abbu, musamman ma Big Dady tunda shi ne  abokin sa ƙwarai, haka yake ta sissinne kai kamar muna-fuki

Su kuwa basu bi ta kansa ba suka ficewar su. Kai tsaye gida suka wuce, sai da suka koma ne suka sanar da Kaka duk abinda ya faru

Gaskiya be ji daɗi ba, domin ya nuna ɓacin ran sa matuƙa a kan Hajja, wanda su kansu sun sha mamaki, duba da yanda Kaka yake son Hajja Fatu sosai, kasancewar ta ɗiyar abokin sa kuma ɗiyar ƙanwar sa, amma kuma sun san yanda yake matuƙar ƙaunar asibitin sa ba ya son ko kaɗan wani abu ya faru, yanzu idan duniya suka ji shikenan za’a fara ma asibitin baƙin fenti. Sosai yayi mata faɗa daga baya ya haɗa su yayi musu nasiha sosai ganin Abba yana ta kumbura da shirin ya aikata wani abun

Abba dai be bar wajen ba sai da ya kafa mata sharaɗi, domin yace “dole sai ta bar aiki,” amma Kaka ya hana sa, shi kuma yace, “to idan haka ya sake faruwa wlh dole ba ita ba aiki a ko wani asibiti ba Asibitin su kaɗai ba, idan kuma tace a’a sai dai ba a ƙarƙashin sa take ba, tunda da sa hannun ta ake son ganin bayan asibitin su, da goyan bayan ta ake shigowa da ƙwayoyi tare da maganin asibiti, nan gaba ma da ita za’a haɗa baki da maƙiyan su don ganin bayan asibitin”.

Abba fa ya shaƙa sosai, ba don Kaka ba babu me tanƙwara shi, sai dai su rabu da Hajja Fatu. Tunda shi Abba duk a cikin su ya fi su zafi, yana da sauƙin kai matuƙa, amma idan ya tashi faɗa ba ya ji ba ya gani, duk wani rashin son raini irin na mahaifiyar su shi ya biyo ta, ba ya shiga harkan mutum, to, kaima kar ka shiga nasa, yanzu zaka ga haukan sa matuƙa, shi kuwa Abbu sak Kaka ne babu ruwan sa, yana da sauƙin kai, haka ma Big Dady, shi kam ya fi su haƙuri, duk da shi ne babba yana da haƙuri matuƙa, idan ka ga yana faɗa kawai yana yi ne domin gyaran ƴaƴan sa, amma duk abinda zai faɗa zai yi wuya ya aikata shi a zahiri, idan ma kayi masa abu kafin zuwa anjima ya manta ransa yayi sanyi, sai dai idan zai ɗaure maka fuska domin ka koki gaba, shima sak halin Ummin sa ya biyo babu ruwan sa.

           Da haka magana ya watse, ranan dai Hajja ta ga banu, domin a zaune ta kwana, sosai hankalin ta ya tashi, ƙarshe ma washe gari ƙin zuwa aiki tayi.

    A ranan ne shi kuma Baffa suka dawo da Sa’adatu, tunda tun jiya da Hajja ta ba shi umarnin zuwa ya ɗauko ta be je ba sai sakaliyan yamma, to, a can ya kwana yau suka dawo.

       Fannin Shakira ma tun a asibiti Sahabi yaje ya bata haƙuri suka koma gida